2009 , 10 च्या काळात अनेक क्रिकेट पंडित; इशांत शर्माचं करिअर संपवूनच धोनी थांबेल का , इशांत शर्माला जरा त्याने ब्रेक द्यावा नाहीतर तो कायमसाठी वनडे क्रिकेटमधून बाहेर जाईल म्हणत होते. शेवटी तेच झालं. 09, 010च्या काळात संगकारा, दिलशान ने इशांत शर्माचे लख्तरं सीमारेशषेवर टांगले होते. पण तरीही धोनी त्याला सतत खेळवत राहिला.
जबरदस्त उंची, शिडशिडीत देहयष्टी यामुळे तो , प्रभावी वेगवान बॉलर होईल असं सारे 2006च्या काळात वर्तवत होते. 07च्या दक्षिण आफ्रिकेच्या दौऱ्यावर निवड झाल्यावर , निघण्याची तयारी झाल्यावर ऐनवेळी त्याला न पाठवण्याचा निर्णय घेतला गेला. अश्या वागणुकीमुळे एका अठरा वर्षाच्या नवोदित बॉलरच्या मनावर, करिअरवर परिणाम होऊ शकतो यावरून निवड समिती आणि कॅप्टन राहुल द्रविडवरही टीका झाली होती.
पुढे राहुल द्रविड , अनिल कुंबळेच्या नेतृत्वात खेळून त्याला त्याचा गॉडफादर मिळाला, महेंद्रसिंग धोनी.
तिथून तो काही वर्षे कायम संघात राहिला. पण वाईट मार खात राहिला.
ताडमाड उंची , चांगला वेग, किचकट बॉलिंग ऍक्शन नसल्याने तो भारदार, धारदार बॉलर होईल वाटले होते. पण गेल्या दशकापासून भारतीय वेगवान बॉलर्सचा एक मानसिक प्रॉब्लेम झालाय. लहानपणी ज्या गोष्टीबद्दल फार कौतुक बघितलं असेल, धमाकेदार काही बघितलं असेल तर पुढे ती गोष्ट करण्याची इच्छा होते.
कदाचित #वेस्टइंडिजची बघितलेली, ऐकलेली “शॉर्ट बॉलिंग” , बाऊन्सर्सचा अतीच परिणाम भारतीय बॉलर्सवर झालाय. हार्दिक पांड्या हे याचं सर्वोत्तम उदाहरण.
अंथरून पाहून पाय पसरावे आणि आपला वेग बघून बाऊन्सर टाकावे हे सध्या भारतीय बॉलर्सना कळत नाही. त्यामुळे इशांत शर्मा कायम आखूड टप्प्याची बॉलिंग करतो. आणि यामुळेच तो संपत गेला.
करिअरच्या सुरवातीला नेहमी “गुड लेंग्थ” , “बॅक ऑफ द गुड लेंग्थ” बॉलिंग करणारा लंबू शर्मा, धोनीने कॅप्टन म्हणून जम , (कंट्रोल) मिळवल्यावर त्याला जास्तीत जास्त शॉर्ट बॉलिंग करायला सांगितले. तेव्हापासून तो शॉर्ट बॉलिंगच्या चक्रात अडकला तो आजवर. पण आता इंग्लंड दौऱ्यावर मात्र तो ‘पुढे’ “आगे बॉल डालने की” शक्यता आहे. त्यामागे विशेष कारण तसंच आहे.
पण याच शॉर्ट बॉलिंगने इशांत शर्माला काही प्रसिद्ध मॅचेसमध्ये स्टार बनवले, हरलेल्या मॅचेस जिंकून दिल्यात. 013 ची इंग्लंडमध्ये इंग्लंडविरुद्ध मिनीवर्ल्डकप- चॅम्पियन्स ट्रॉफीची फायनल, अशक्यप्राय विजय शेवटच्या क्षणाला खेचला होता. “शॉर्ट बॉलिंग’” वर इंग्लंडने विकेटस फेकल्या. पुढील काम स्पिनर्सने केले होते.
2014च्या प्रसिद्ध लॉर्ड्स टेस्टमध्ये हिरव्या कुरणावर अजिंक्य राहाणेने शतक ठोकल्यावर शेवटच्या इनिंगमध्ये शॉर्ट बॉलिंगवरच इशांत शर्माने सात विकेटस घेतल्या भारताला टेस्ट मॅच जिंकून दिली आणि लॉर्ड्स गॅलरीत आपले नाव कायमसाठी नोंदवले. लॉर्ड्सवर शतक किंवा बॉलरने पाचपेक्षा जास्त विकेटस घेतल्या तर त्याचं लॉर्ड्स गॅलमध्ये नाव लिहिण्याचा मान मिळतो.
#इशांतशर्माचा_एक_खास_प्रसंग
#ऑर_एक_ओव्हर_करेगा_क्या
इशांत शर्माची सगळ्यात मोठी आणि टेस्ट्स मध्ये अतिमहत्वाची खासियत आहे ती त्याची लांब स्पेल टाकण्याची क्षमता.
टेस्ट्समध्ये स्पिनर्सचं एक काम असतं की एका एन्डने सलग सकाळपासून संध्याकाळपर्यंत बॉलिंग करत राहणे. फास्ट बॉलर्स असे करू शकत नाही. कोणताही फास्ट बॉलर पहिला स्पेल टाकून झाल्यावर नंतर पाच ओवर्सहुन जास्त ओव्हर्सचा स्पेल करत नाही.
शर्माजी इथे #श्रमजीवी ठरतात. तो सहा ते सात कधी सलग आठ ते नऊ ओव्हर्सही त्याने केले आहेत. आणि तेही जास्त रन्स न देता. म्हणून तो टेस्ट टीममध्ये असायला हवा वाटतो.
त्याच्या याच श्रमजीवी क्षमतेमुळे 2008 मध्ये ऑस्ट्रेलियाविरुद्ध एक खास प्रसंग घडला होता.
ऑस्ट्रेलियात ऑस्ट्रेलिया विरुद्ध इशांत शर्मा डोळ्यांचे पारणे फिटवणारी बॉलिंग करत होता. त्याच्या बॉलिंगवर रिकी पॉंटिंगला दिवसा तारे दिसत होते. पण सलग सहा सात जबरे ओव्हर्स टाकल्यामुळे #कॅप्टनअनिलकुंबळे इशांत शर्माला विश्रांती देणार होता. तेव्हा वीरेंद्र सेहवाग अनिल कुंबळेजवळ गेला आणि म्हणाला की दिल्ली टीममध्ये माझ्या कॅप्टन्सीमध्ये इशांत शर्मा खेळतो . त्यामुळे मला माहितीय की हा मोठे स्पेल टाकू शकतो. पॉंटिंग स्ट्राईक पे हैं! उसको और एक ओव्हर दो!
अनिल कुंबळेने इशांत शर्माला विचारलं “और एक ओव्हर करेगा?”
आधीच सेहवागने कौतुक केल्याने उत्साह आल्याने लंबूने म्हटलं “ हा करुंगा!”
ओव्हरच्या पहिल्या की दुसऱ्या बॉलवरच , “बॅक ऑफ द गुड लेंग्थ” बॉलवर पॉंटिंगच्या बॅटची कड घेऊन कॅच पहिल्या स्लिपमधील राहुल द्रविडच्या सुरक्षित हातांमध्ये विसावला. इशांत शर्मा जल्लोषात सेहवागकडे धावत गेला आणि त्याला मिठी मारली.
08 मध्ये ऑस्ट्रेलिया आणि इतर टीमचे दात घश्यात घालणारा लंबू शर्मा त्यानंतर अनेक वर्षे लांब टप्प्याची बॉलिंग न करता आखूड टप्प्याची ,शॉर्ट बॉलिंग करून त्याने स्वतःची “विकेट टेकिंग अॅबिलिटी” पूर्णपणे कमी केली. बॉलिंगमधील स्विंग गेला. त्याचा बॉल सीम कधी व्हायचा तसाही नाहीच.
त्याच्या मागून येऊन भुवनेश्वर कुमारने बॉलिंगमध्ये स्वतःबद्दल विश्वास दिला. बुमराहलातर त्याच्या आधी टेस्टमध्ये पसंती मिळू लागली आहे. पण कॅप्टन धोनीमुळे त्याचा #इरफानपठाण झाला नाही. इरफान पठणचा स्विंग आणि सीम संपल्यावर आणि विशेषतः #ग्रेगचॅपल ची गच्छंती झाल्यावर इरफान पठाणचा कोणी वाली राहिला नव्हता. तो कायमस्वरूपी बाहेर गेला.
इशांत शर्मावर मात्र धोनीवरदहस्त होता.
पण यावर्षी एक महत्वाची गोष्ट घडली. इंग्लंड दौर्यापूर्वी इशांत शर्मा इंग्लंडमध्ये पहिल्यांदा #काऊंटीक्रिकेट खेळला. काउन्टी क्रिकेटचं महत्व काय असतं हा एक स्वतंत्र विषय आहे. आयपीएलचा बाजार सुरू होण्याआधी भारतीय क्रिकेटपटू दरवेळी उन्हाळ्यात ते जून पर्यंत इंग्लंडमध्ये काऊंटी क्रिकेट खेळत.
या काऊंटी क्रिकेटमध्ये ससेक्सकडून खेळताना त्याने शॉर्ट बॉलिंग न करता ‘पुढे’ बॉलिंग केली. “आगे बॉल डाला”. जे तो करीअरच्या अगदी सुरवातीला करायचा. आणि प्रभावी वाटायचा.
त्यामुळे या इंग्लंड दौऱ्यात भुवनेश्वर कुमार नसताना, जी एक फार वाईट गोष्ट झालेली आहे, बूमराह नसताना सगळ्यात जास्त अनुभवी बॉलर पण कधीही प्रभावी नेतृत्व न करु शकलेला इशांत शर्मा याने कायम गुड लेंग्थ आसपास बॉलिंगकरून इंग्लंडमध्ये भारताच्या बॉलिंगची बाजू सांभाळावी. अशी अपेक्षा आहे.
इशांत शर्माच्या बॉलिंगमधून ‘स्विंग’ हरवलाय. भेदकता फार कमी झालीये. पण तरीही टेस्ट टीममध्ये एक एन्ड सांभाळत बॉलिंग करत बघताना तो डोळयांना छान वाटतो.
विराट कोहली कॅप्टन झाल्यापासून सर्वच खेळाडू ‘स्लेजिंग’ करत आक्रमक झालेले आहेत. जी चांगली गोष्ट आहे. अगदी गरीब गाय चेतेश्वर पूजाराही बडबडायला लागलाय. त्यामुळे कायम शांत, आणि हसमुख असलेला इशांत शर्माही आता ‘एक्सप्रेसिव्ह’ झालाय. बॉल आणि शब्दांनीच नाही तर ‘चेहऱ्याने’ सुद्धा.
त्याचा ‘ओव्हरएक्सप्रेसिव्हनेस’ मागच्या वर्षी #स्टीव्हस्मिथने बघितला आहे.
इशांत शर्माची बॅटिंग हा एक स्वतंत्र विषय आहे. यावर एकदा लिहिलं होतं.
एक ऑगस्टपासून अनुभवी , श्रमजीवी लंबू #रणवीरसिंग लुक अलाईक इशांत शर्मा बॉलिंगमध्ये नेतृत्व करून , जुनं शॉर्ट बॉलिंगचं मेंटल प्रोग्रॅमिंग बदलून ‘पुढे’ बॉलिंग करणार अशी अपेक्षा आहे. काऊंटी क्रिकेट खेळल्याचा फायदा त्याने दर्शवायला हवा.
#WhiteClothesCricketLover
#RedcherryCricket
- Abhijeet Panse
No comments:
Post a Comment