मोहना चितळे

#Women's-day-week.

 मला व्याख्यान आणि प्रवचने दोन्ही लहानपणापासून ऐकायला खूप आवडतात. त्यातून अनुक्रमे बौद्धिक आणि मानसिक आनंद मिळतो.
एकदा डिसेंम्बर 2014 ला एका मित्राला शनिवार पेठेतील “पे अँड स्टडी” रूममध्ये भेटायला गेलो असता, त्याला अर्धा तास वेळ असल्याने , जवळच असलेल्या प्रसिद्ध ओंकारेश्वर मंदिरात गेलो. तेव्हा दत्त जयंतीचं वातावरण होतं. तेथे गुरुचरित्र सप्ताह सुरू होता.

समोरील मोकळ्या भागात सतरंज्या टाकल्या टाकल्या होत्या. थोडे लोक बसले होते. मी आत जाऊन बाहेर आलो तेव्हा एक पन्नाशी साठीतील स्त्री, ताठ मांडी घालून व्यासपीठावर माईकसमोर बसलेल्या होत्या. मध्यम उंची, पिकलेले केस, शिडशिडीत पण तरतरीत व्यक्तीमत्व.
 तेवढ्यात त्यांनी गीता आणि त्या संबंधित गोष्टींवर प्रवचन सुरू केले.

खणखणीत भाषा, शब्दांवर हुकूमत..कुठेही अं ..अं नाही, बोलण्यात कंप नाही..एका लयीत त्या बोलत होत्या. मी 15 मिनिटे वेळ घालवायला ओंकारेश्वरला गेलो होतो. थोड्यावेळ बसावं म्हणून बसलो. पण पुढील दोन तास सलग खिळून बसलो.
मित्राला मेसेज करून फोन बंद केला. प्रवचन आटोपलं तेव्हा बघितलं संपूर्ण आवार श्रोत्यांनी भरलेला होता.

त्यांचं नाव काय होतं माहिती नव्हतं. जाताना बाहेर बोर्डावर दिसलं, दत्त जयंतीपर्यन्त सलग सात दिवस ....या विषयावर “मोहना चितळे” यांचं प्रवचन.
तेव्हा त्यांचं नाव मोहना चितळे आहे हे कळलं.

त्यानंतर मी ठरवून काही दिवस संध्याकाळी त्यांचं प्रवचन ऐकायला गेलो. नंतर जमलं नाही याची खंत वाटायची. पण दत्त जयंतीला खास ठरवून गेलो. उशीर झाला . शेवटचे काही मिनिटं ऐकायला मिळालं त्यांना. खूप गर्दी होती. सगळ्यात मागे उभा होतो. त्यादिवशी त्यांच्या प्रवाचनातील शेवटचे पंधरा मिनिटे सेलमध्ये रेकॉर्ड केलेत. आजवर ऐकतो.

फक्त त्यांचं बोलणं ऐकायला इतक्या दूर जायचो.
त्यानंतर पुन्हा कधी त्यांना बघितलं नाही..ऐकलं नाही.
पण एक अप्रतिम ओजस्वी वाणीचा वक्ता ऐकल्याचा आनंद मिळाला.

जागतिक महिला दिनानिमित्ताने हे त्यांना समर्पित.

Abhijeet Panse