म्हारी छोरी छोरीयोंसे कम हैं के! दंगल चित्रपटात महावीर फोगट यांची भूमिका करत असलेल्या आमीर खानने म्हटलेलं हे प्रसिद्ध वाक्य आहे. गीता बबिताला समाजाच्या , पारंपरिक मानसिकतेच्या विरुद्ध जाऊन महावीर फोगट यांनी मुलींना कुस्तीचं प्रशिक्षण दिलं आणि त्यांनी भारताला सुवर्णपदक मिळवून दिलं. संपूर्ण घराणंच हे खेळात, कुस्तीला वाहिलं आहे. देशाला अनेक मानसन्मान मिळवून दिला आहे.
महावीर फोगट यांची पुतणी आणि गीता बबिता यांची चुलत बहीण विनेश फोगटही आता आपल्या घराण्याचा वारसा पूढे चालवत आहे.
विनेश फोगट हिने सध्या जकार्ता येथे सुरू असलेल्या आशियाई खेळ स्पर्धेत भारताला फ्री स्टाईल कुस्तीमध्ये सुवर्णपदक मिळवून दिले.
तिने फायनलमध्ये जपानच्या युकी इरी ला या खेळाडूला हरवून सुवर्णपदक मिळवले. या सोबत ती प्रथम महिला खेळाडू ठरली जिने आशियाई खेळात भारतासाठी सुवर्णपदक मिळवले.
फायनलपूर्वी तिचा सामना झाला उजबेकिस्तानच्या महिला पेहलवान खेळाडू सोबत. तिचं नावाचा प्रत्येकाने स्वतःला जमेल तसा उच्चार करावा.
हा सामना अद्भुत होता. या सामन्यात विनेश फोगटची कला, शक्ती, तांत्रिक प्रभुत्व याचं संपूर्ण प्रदर्शन झालं. पिवळ्या रंगाचं अॅथलिट वेषात खेळताना फक्त पंच्याहत्तर सेकंदात तिने सेमिफायनलमध्ये उजबेकिस्तानच्या खेळाडूला हरवले. सुरवातीचे काही सेकंद अंदाज घेत, योग्य संरक्षण आणि आक्रमण ती करत होती. पण साठ सेकंदानंतर तिला संधी मिळाली जबरदस्त आक्रमण करायला. कुठलाही कुस्तीवीर आपले पाय प्रथम वाचवत असतो विरोधी कुस्तीवीरापासून, कारण एकदा विरोधी खेळाडूच्या पायाची पकड मिळाली की सामन्यावरची पकड घट्ट होते.
विनेश फोगटला सामना सुरू झाल्यावर एक मिनिटानंतर ती नामी संधी मिळाली. आणि अक्षरशः नागीण जशी दुसऱ्या नागिणीला अंगाला गुंडाळून पराजित करेल अश्या स्थितीत येऊन, नियमांना धरून, तिने विरोधी खेळाडूला आडवं पडून, फिरवून पिवळ्या वर्तुळाच्या बाहेर नेले. मगर जशी आपल्या भक्ष्याला धरून , भक्ष्य विरोध करत असताना त्याला धरून उताणी आणि पालथी होत फिरवते तसं विनेश फोगटने उझबेकिस्तानच्या खेळाडूला फिरवून बाहेर नेले. तिच्या या डावाला विरोधी खेळाडूकडे काहीही उत्तर नव्हते. अद्भुत खेळून अगदी सहजरित्या; सामना सुरू होऊन पंच्याहत्तर सेकंदात विनेश फोगट फायनलमध्ये प्रवेशली होती.
दोन तासांनी तिची लढत होती जपानच्या खेळाडूशी. ही लढत होती फायनल्स. सुवर्णपदकासाठी.
हा सामना फार चुरशीचा झाला. जपानची खेळाडूसुद्धा निष्णात कुस्तीवीर होती. निळ्या वेषात विनेश खेळत होती.
सुरवातीला आक्रमण करत विनेश फोगटने चार गुण मिळवलेत. पण त्यानंतर आपली आघाडी कायम राहावी म्हणून तिने सतत संरक्षक पवित्रा अंगिकारला. पंचाच्या ते लक्षात आल्याने त्यांनी खेळ ऍक्टिव्ह टाईम मध्ये टाकला. जे विनेशच्या विरुद्ध जाण्याची शक्यता जास्त होती. जो खेळाडू मुद्दाम संरक्षक खेळत असेल तर पंच सामना तीस सेकंदासाठी ऍक्टिव्ह टाईममध्ये टाकतात. यांत त्या खेळाडूला तीस सेकंदात एक गुण तरी मिळवावा लागतो , नाहीतर एक गुण विरुद्ध खेळाडूला दिला जातो. शेवटी तेच झालं. विनेश फोगटने गरजेपेक्षा जास्त संरक्षक पद्धतीने खेळल्याने पंचांनी सामना ऍक्टिव्हेट टाईममध्ये टाकल्यावर जपानच्या खेळाडूने विनेशला एक गुण मिळवू दिला नाही. परिणामी एक गुण जपानच्या खेळाडूला बहाल करण्यात आला. गुण तेव्हा चार - एक होते. तीन गुणांनी विनेश फोगट समोर होती.
शेवटच्या काही सेकंदात पुन्हा विनेशने अप्रतिम जबरदस्त डिफेन्सचं प्रदर्शन केलं आणि आपली आघाडी कायम राखली. शेवटच्या सहा सेकंदात पुन्हा तांत्रिकदृष्ट्या दोन गुण मिळवले आणि सहा- दोन गुणांनी फायनल्स जिंकले. त्या क्षणाला ती पहिली भारतीय महिला खेळाडू ठरली जिने आशियाई स्पर्धेत सुवर्णपदक मिळवले. भारताचा ध्वज फडकला. भारताचे राष्ट्रगीत वाजले.
काटक , अस्सल अॅथलिट शरीर , चांगली उंची, ही विनेश फोगटचे जमेची बाजू आहे. आपल्या चुलत बहिणींप्रमाणे तीनेही आता सुवर्णपदक मिळवले आहे. यापूर्वी कॉमनवेल्थ गेम्समध्येही तिने चांगली कामगिरी केली होती.
आशियाई खेळ स्पर्धेत भारताकडे सध्या चार सुवर्णपदक आहेत. कबड्डीमध्ये भारताला कोरियाकडून एक गुणांनी हार पत्करावी लागली. साक्षी मलिकही खूप लढून शेवटी हरली. तिचा अतिआत्मविश्वास अंगाशी आला हे तिचे सामने बघताना जाणवले.
कोल्हापूरच्या राही सरनौबतने भारताला सुवर्णपदक मिळवून दिलं आहे. बजरंग पुनियाने प्रथम सुवर्णपदक मिळवून दिले. सोळा वर्षीय सौरभ चौधरीने शूटिंगमध्ये सुवर्णपदक मिळवले.
एकंदर भारतीय अॅथलिट्स आशियाई स्पर्धेत चांगली कामगिरी करत आहेत. येत्या काही दिवसांत पदकांमध्ये आणखी वाढ होण्याची शक्यता आहे.
भारतीय खेळाडू छोरी और छोरिया किसिसे कम नही है!
No comments:
Post a Comment